ՎՍՀ-ում ՀՀ դեսպան Վահրամ Կաժոյանի մասնակցությունը Հայրենական մեծ պատերազմի 78-ամյակին, Հարավային Վիետնամի ազատագրման և երկրի միավորման 48-ամյակին ու Դիեն Բիեն Ֆու քաղաքի մոտ տեղի ունեցած ճակատամարտում հաղթանակի 69-ամյակին նվիրված միջոցառմանը:

04 մայիսի, 2023

Ս․թ․ մայիսի 4-ին ՎՍՀ-ում ՀՀ դեսպան Վահրամ Կաժոյանը մասնակցեց Հայրենական մեծ պատերազմի 78-ամյակին, Հարավային Վիետնամի ազատագրման և երկրի միավորման 48-ամյակին ու Դիեն Բիեն Ֆու քաղաքի մոտ տեղի ունեցած ճակատամարտում հաղթանակի 69-ամյակին նվիրված միջոցառմանը, որը համատեղ կազմակերպել էր ՎՍՀ-ում Ռուսաստանի Դաշնության դեսպանությունը և ՎՍՀ Հո Շի Մինի դամբարանի կառավարման հարցերով պետական հանձնաժողովը։

Ելույթներով հանդես եկան Հո Շի Մինի դամբարանի կառավարման հարցերով ՎՍՀ պետական հանձնաժողովի նախագահի պարտականությունները կատարող գեներալ-մայոր Բույ Հայ Շոնը և ՎՍՀ-ում Ռուսաստանի Դաշնության դեսպան Գեննադի Բեզդետկոն, ՎՍՀ-ում Հայաստանի Հանրապետության դեսպան Վահրամ Կաժոյանը, ՎՍՀ-ում Բելառուսի Հանրապետության դեսպան Վլադիմիր Բորովիկովը և ՎՍՀ-ում Ղազախստանի Հանրապետության դեսպան Երլան Բայժանովը։

Իր ելույթում դեսպան Վահրամ Կաժոյանը ներկաներին շնորհավորեց հոբելյանական միջոցառումների կապակցությամբ, որոնք ավանդաբար նշվում են նախկին ԽՍՀՄ երկրներում և Վիետնամում: Դեսպան Կաժոյանը նշեց, որ Հայրենական Մեծ պատերազմում Հայաստանից մասնակցել են 700 հազար հայեր, որոնցից 450 հազարը չեն վերադարձել ռազմաճակատից՝ հավելելով նաև, որ պատերազմի ընթացքում Հայաստանը տվել է 102 ԽՍՀՄ հերոսներ, այդ թվում այնպիսի հայտնի զորավարներ, ինչպիսիք են մարշալ Բաղրամյանը, զրահատանկային զորքերի մարշալ Բաբաջանյանը, ավիացիայի մարշալ Խուդյակով-Խանփերյանցը և նավատորմի ծովակալ Իսակովը:

ՀՀ դեսպանն իր ելույթում նաև կարևորեց 1975 թվականին Հարավային Վիետնամի ազատագրումը և երկրի վերամիավորումը՝ մեջբերելով Վիետնամի առաջին նախագահ Հո Շի Մինի խոսքերը՝ «Չկա ավելի կարևոր բան, քան անկախությունն ու ազատությունը», որոնք այսօր իսկ ակտուալ են հայ ժողովրդի համար: Դեսպան Կաժոյանն իր ելույթում նաև անդրադարձավ Հայաստան-Վիետնամ հարաբերություններին՝ կարևորելով 1959 թվականի հուլիսի 21-23-ը նախագահ Հո Շի Մինի՝ Հայաստան կատարած այցը:

Միջոցառման ավարտից հետո դեսպաններն ու մասնակից դեսպանությունների դիվանագետները և մյուս պատվավոր հյուրերը, մասնակցեցին Հո Շի Մինի դամբարանին ծաղկեպսակների զետեղման արարողությանը, որից հետո այցելեցին Հո Շի Մինի դամբարան՝ հարգանքի տուրք մատուցելով Վիետնամի առաջին նախագահ Հո Շի Մինին: Այնուհետև դեսպաններն այցելեցին Վիետնամի Զոհված հերոսների հուշարձան, որտեղ ևս զետեղեցին ծաղկեպսակներ՝ ի հիշատակ Հայրենական մեծ պատերազմում, Հարավային Վիետնամի ազատագրման ու Դիեն Բիեն Ֆու քաղաքի մոտ տեղի ունեցած ճակատամարտում նահատակված հերոսների սխրանքի:

Հիշատակի և հարգանքի տուրքի մատուցման պաշտոնական արարողություններին ներկա էր ՀՀ դեսպանության երկրորդ քարտուղար Արամազդ Մուրադյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր